Leef ‘n eerbare en toegewyde lewe

Ons tyd en samelewing maak dit nie vir ons maklik om die sewende gebod te gehoorsaam nie.

Op televisie en in films is egskeidings aan die orde van die dag.

Op ons telefone is pornografie maklik toeganklik.

In die winkelsentrums is advertensies van vroue in onderklere, foto’s veel groter as die mense self.

As mens na die verlede kyk, blyk dikwels dat as standbeelde van mense groter as lewensgroot is, dit ‘n ideologie word, meer nog, ‘n afgodery.

In China is enorme foto’s en standbeelde van die president, hy word soos ‘n god vereer.

En hier in die Weste word dus ook ‘n afgod vereer – die seksualiteit.

Die enorme foto’s is daarvan ‘n voorbeeld, en die feit dat pornografiie die grootste besigheid op internet is.

Maar te midde van hierdie afgodediens roep die Skrif ons op: Julle geheel anders, want julle het Christus leer ken!

Dit mag dalk onmoontlik voel, want ons word daagliks gebombardeer met hierdie afgod.

En selfs onder Christene sien ons geweldige erosie van die sewende gebod.

Egskeiding het in baie kerke amper gewoon geword, hertrou ook.

Ongetroud saamwoon, of saamslaap, ook.

Laas vertel iemand my dat hy omtrent die enigste op sy werk is wat nog gewoon getroud is.

Baie kinders groei in een-ouer huisgesinne op.

Ja veral kinders is die slagoffer van hierdie afgodery.

En dan praat ons nog nie eers oor die nuutste trend in die Weste nie.

Die feit dat manne met manne mag omgaan en trou, en vroue met vroue.

En die opinie dat daar nie net manne en vroue is nie, maar meerdere geslagte, ‘n hele spektrum.

Al hierdie dinge laat mens opnuut jouself afvra: Wat is normaal? Wat is reg?

Kom ons gaan vanaand weer terug na God se Woord, gemeente.

Want ons bely saam met alle gelowige voorgeslagte: Dit is normaal.

God se wil is normaal, en sal die normaal bly deur alle eeue heen.

 

Tema: Leef ‘n eerbare en toegewyde lewe

Ons kyk vanaand na die sewende gebod, en spesifiek na:

1 Wat God verbied

2 Wat God moontlik maak

3 Wat God gebied

 

1 Wat God verbied

Nou om met die deur in huis te val, ja dit is soos God die mens geskape het.

Man en vrou het Hy hulle geskape.

So was sy wil, dit is die volmaakte skepping, dat twee geslagte mekaar aanvul in ‘n wonderbare eenheid.

Natuurlik het die sonde baie stukkend gemaak.

Net soos ander gebreke word daar ook mense met seksuele gebreke gebore.

Maar dit is nie normaal nie.

En ons mag God dank dat die verreweg meeste mense nie so gebore word nie.

 

Maar ja, die sonde het soveel stukkend gemaak.

En die Satan doen sy bes om mense weg te trek van wat gesond is, en van dit wat die Here beveel op seksuele gebied.

 

Ons het vanaand enkele gedeeltes uit die Bybel gelees.

Kom ons begin met die wette wat Moses van God ontvang en opgeskryf het.

Die 10 gebooie is welbekend.

Maar in die boeke Exodus, Levitikus, Numeri en Deuteronomium is daar baie meer gebooie, baie meer as 10.

Al hierdie verskillende gebooie kan egter terugherlei word na een van die 10.

In Exodus 22 vind ons bepalings wat op verskillende gebooie teruggaan.

En so handel verse 16-19 oor die sewende gebod.

Dit gaan oor twee jongmense wat nog nie getroud is nie.

Ons lees: “As iemand ‘n jongmeisie wat nie verloof is nie, verlei ...”

Dit beteken, dit is nie ’n geval van verkragting nie.

Beide die seun en die meisie het gewilliglik by seks betrokke geraak.

Hulle was nie met mekaar getroud nie en ook nie verloof nie.

Dit beskou die Here as 'n ernstige oortreding.

Die rede hiervoor is dat God bepaal het dat die huwelik die enigste wettige plek vir seksuele omgang is.

Daarom, wanneer so iets gebeur, is dit nie net 'n insident, waarna hulle lewens weer aangaan soos voorheen nie.

Inteendeel, ons lees dat daardie seun verplig is om met haar te trou!

Hy sal die volle bruidsprys moet betaal en met haar trou.

 

Kom ons probeer die implikasie van hierdie teks goed begryp.

Die implikasie is dat elke daad van seksuele omgang die verpligting om te trou meebring.

Maak nie saak of daar ‘n baba kom of nie, net as gevolg van die feit dat hulle seksuele omgang gehad het, behoort hulle met mekaar te trou.

Dit is die wil van die Here, soos die HERE ons in hierdie verse openbaar.

Dis is dus 'n daad met verreikende gevolge.

Ons behoort baie deeglik hiervan bewus te wees, veral in 'n omgewing waar mense seks as 'n goedkoop artikel beskou.

Seksuele omgang het verreikende gevolge.

 

In vers 17 lees ons egter nog iets.

"As haar vader beslis weier om haar aan hom te gee ...”

Dit beteken dat daar wel een manier is om ‘n huwelik nie te laat plaasvind nie.

Dit is wanneer die vader (ons kan aanvaar dat die moeder ook geïmpliseer word, wat ‘n eenheid met die vader vorm), absoluut weier om sy dogter aan daardie seun te gee.

Hulle, die ouers, is die enigstes wat hieroor kan besluit.

Let op, nie die seun nie.

Hy mag nie sê: Wel, ek is so jammer, maar dit was nie my plan om met haar te trou nie.

Die seun is nie geregtig om so iets te sê nie.

Hy moet die gevolge van sy daad dra.

Hy moet haar as vrou neem, hy moet die volle bruidsprys betaal.

 

Maar wat as die meisie hom nie as man wil hê nie?

Ook in daardie geval het sy geen keuse nie.

Sy moet ook die gevolge van haar daad dra.

Sy is nie verkrag nie, sy het ook gewilliglik betrokke geraak.

Die enigste een wat anders mag besluit, is die pa.

Wanneer hulle as ouers by voorbaat al raaksien dat die twee glad nie in ‘n huwelik gaan pas nie, of dat sy dogter doodsbenoud is om met hom te trou, dan kan hy besluit om die huwelik nie te laat deurgaan nie.

Ons sien weereens hoe belangrik God die eenheid van die huwelik ag, aangesien dit die enigste plek is waar seksuele omgang 'n wettige plek gekry het.

 

Kom ons neem aan die pa het besluit dat die seun en die meisie glad nie geskik is om met mekaar te trou nie.

Maar, sê vers 17, dit beteken nie dat die seun nou vry is om te gaan nie.

Soos ons lees: hy moet “geld gee volgens die huweliksprys vir jongmeisies.”

So al trou hy nie met haar nie, moet hy steeds – kom ons noem dit – ’n boete betaal.

In Deuteronomium 22, waar hierdie gebod herhaal word, staan die bedrag van die boete.

Ons lees daar: “dan moet die man wat met haar gemeenskap gehad het, die vader van die dogter vyftig sikkels silwer gee” (Deut 22:29).

50 sikkels silwer was ‘n groot bedrag, vergelykbaar met ongeveer vyf jaar se salarisse vir ‘n arbeider. Regtig 'n groot boete!

Weereens kan ons hieruit leer dat seksuele omgang voor die huwelik in God se oë 'n ernstige oortreding is.

Nie net wanneer die meisie swanger raak nie.

Elke geval van seksuele omgang buite die huwelik is 'n ernstige oortreding.

Mans moet dus hul verantwoordelikheid ken om die meisies uit te los.

Jongmense moet mekaar se maagdelikheid respekteer.

Meisies moet ook God se wil respekteer, byvoorbeeld om nie uitdagend aan te trek nie.

 

Seksualiteit is 'n wonderlike skepping van God.

Maar ongelukkig het die mensdom dit in alle opsigte korrup gemaak.

Maar danksy Jesus Christus word ons gesindheid vernuwe, deur die werk van sy Woord en Gees in ons.

Hy maak ons ​​weer gewillig om die Here te dien, en om die voordeel te besef daarvan om sy gebooie te onderhou.

Hy gee ons die krag om versoeking te weerstaan ​​en getrou te bly, om te wag, om hierdie groot en verreikende skeppingsgawe binne die veilige grense van die huwelik te geniet.

Danksy Jesus begin ons lewe, selfs ons seksuele lewe, herstel word.

 

Dit is nooit te laat om die Here te begin dien nie.

Selfs al het jy 'n baie vuil verlede.

Jesus is in staat om al jou sonde weg te was.

Hy gee jou die geleentheid om 'n nuwe begin in jou lewe te maak.

Hy stel jou in staat om ‘n eerbare en toegewyde lewe te lei.

 

(Tema: Leef ‘n eerbare en toegewyde lewe

Ons kyk vanaand na die sewende gebod, en spesifiek na:

1 Wat God verbied)

 

2 Wat God moontlik maak

In Kolossense en Thessalonisense het ons gelees oor die wonderlike verandering, verbetering, in die lewens van die Kolossense.

Dit het alles begin toe hulle van Jesus gehoor het.

Soos Paulus sê: Julle is saam met Christus opgewek.

Alles wat Jesus verdien het, en alles wat Jesus besit, het Hy ook met die Kolossense gedeel.

En op basis hiervan spoor Paulus hulle nou aan om hul lewenstyl te verander.

 

Jesus het die Kolossense en Thessalonisense skatryk gemaak.

Julle is saam met Christus opgewek!

Dit beteken, geen ewige dood meer nie, maar die vrede van Christus skyn oor julle lewe.

Sy vergifnis, sy verlossing. sy heiligmaking.

Jy het die sleutel tot 'n beter lewe ontvang.

Paulus dring dus by die Kolossense aan: Maak gebruik van daardie sleutel.

Moenie dit begrawe nie.

Moenie van jou fortuin vergeet nie!

Gebruik dit!

Rig julle harte op dinge daarbo, waar Christus aan die regterhand van God sit.

Rig jou gedagtes op die dinge wat Christus behaag, nie op sondige dinge nie.

Inderdaad, God het dit vir jou moontlik gemaak om 'n heilige en eerbare lewe te lei.

Paulus skryf aan die Thessalonisense. “Verder dan, broers, vra ons julle, en spoor ons julle ter wille van die Here Jesus aan: Julle is deur ons onderrig oor hoe julle moet leef om God te behaag; julle leef inderdaad reeds hiervolgens, maar julle moet nog al hoe meer so leef.” (1 Thess 4:1)

As Paulus sê: “julle moet nog al hoe meer so leef”, sê hy dit met die besef dat Jesus dit vir hulle moontlik maak om dit te kan doen.

Sonder Jesus sou dit onmoontlik gewees het om hulle aan te spoor om hul lewens te verbeter.

Maar omdat Jesus in hulle lewens gekom het, is dit moontlik.

Dit word so mooi gestel in hoofstuk 3:12, waar Paulus tot God bid vir die Thessalonisense, dat Gód hulle liefde mag laat toeneem en oorvloedig maak ...

En daarom word hulle daaraan herinner; hulle word aangespoor om meer en meer volgens die lewenstyl van Jesus te leef.

Iemand wat 'n miljoenêr is, sal nie in 'n krot woon nie.

Iemand wat Jesus ontvang het, se lewe sal nie 'n gemors bly nie.

Dit is goed om hieraan herinner te word, want dit geld ook vir ons, vandag.

Wanneer God jou aanspoor om op 'n sekere standaard te leef, om jou lewenstyl op te gradeer, stel Hy ons in staat om al hoe meer in daardie rigting te groei.

So in werklikheid verwag God van jou die einste ding wat Hy aan jou geskenk het.

Jy het die rykdom in Christus ontvang, nou wil Hy hê jy moet dit gebruik.

God het dit vir jou moontlik gemaak om 'n eerbare en toegewyde lewe te lei.

 

(Tema: Leef ‘n eerbare en toegewyde lewe

Ons kyk vanaand na die sewende gebod, en spesifiek na:

1 Wat God verbied

2 Wat God moontlik maak)

 

3 Wat God gebied

In die verbond met die Here is daar ‘n belofte en ‘n eis.

Die Here gee eers alles, en wil dan jou liefde en dankbaarheid vir Hom sien in ‘n toegewyde lewe. God eis nou van jou om 'n heilige en eerbare lewe te lei.

In 1 Thessalonisense 4:2 lees ons: “Julle weet tog watter voorskrifte ons vir julle gegee het deur die Here Jesus.”

Paulus konsentreer op een van daardie opdragte: Dit is God se wil dat jy jou van seksuele onsedelikheid moet onthou.

In die ou vertaling word die woord “hoerery” gebruik.

Die Griekse woord hier is porneia (van hierdie woord is die hedendaadse woord pornografie afgelei).

Hierdie woord dui op alle vorme van seksuele gedrag wat teen God se wil ingaan.

 

Dan word ons daaraan herinner dat ons liggaam 'n tempel van die Heilige Gees is.

Die tempel van die Heilige Gees moet skoon en heilig gehou word.

En daarom word ons aangespoor dat elkeen homself moet oefen om sy eie liggaam te kan beheer op 'n wyse wat eerbaar en aan die HERE toegewyd is, dat jy nie aan seksuele onsedelikheid moet deelneem nie.

Seksuele onsedelikheid dui op alle vorme van seksuele sonde, hetsy egbreuk, omgang voor die huwelik, prostitusie, pornografie, vuil praatjies en grappies, ensovoorts.

Jesus roep ons op om nie eers begeerlik na ‘n vrou te kyk nie.

As ons nie begeerlik na vroue wat ons in die alledaagse lewe teëkom mag kyk, hoeveel te meer geld dit nie vir pornografie nie!

In teenstelling hiermee moet jy as Christen jou liggaam en gedagtes beheer, en jouself oefen om dit in toom te hou.

Dit is ‘n leerskool en daar is tye wat ons terugval.

Maar in ‘n gelowige se lewe moet daar erken word dat iets sondig is, en daar moet teen gestry word. Die Bybel leer ons dat die beste manier dikwels is om te vlug vir die sonde, soos Josef gevlug het toe Potifar se vrou met hom owerspel wou bedryf.

Bly weg van plekke en van mense wat jou kan verlei tot iets wat verkeerd is.

 

Die woord heilig beteken om jouself af te sonder van die sonde en toe te wy aan die lewenswyse wat die Here verlang.

Soos die priesters destyds die tempel silwerskoon moes hou, so moet ons ons liggame – wat die Heilige Gees se tempel is – skoonhou.

 

Ook word mans in 1 Thessalonisense 4:4 opgeroep om “sy eie vrou op ‘n heilige en eerbare wyse te verkry”.

Dit wys op hoe jong mans 'n vrou moet soek.

Mense wat nie die Here vrees nie, sal 'n vrou soek met die verkeerde kriteria.

Hulle sal met name op die uiterlik let.

Maar dit is nie die manier waarop 'n Christen jongman sy vrou moet soek nie.

Jy moet op 'n heilige en eerbare manier 'n vrou soek.

Gee aandag aan wat aan die binnekant is.

Vrees daardie meisie die Here?

Gehoorsaam daardie meisie sy gebooie?

Is daardie meisie 'n toegewyde Christen?

Gaan daardie meisie getrou kerk toe?

Hierdie aspekte behoort baie meer gewig te dra onder Christen jongmans as die uiterlike voorkoms van die vrou.

Dit sal ‘n baie slegte ontwikkeling wees as jongmans in die kerk nie meer ‘gaan’ vir meisies in die kerk, omdat hulle nie so uitdagend soos die meisies buite die kerk (of dalk in ander kerke) aantrek nie.

‘n Christen jongman moet in staat wees om nie net die buitekant raak te sien nie.

 

Ek herhaal, dit pas nie vir 'n Christen, wie se liggaam 'n tempel van die Heilige Gees is, om allerhande vuil sondige gewoontes, of dit pornografie, prostitusie of net vuil praatjies is, in sy lewe toe te laat nie.

Jou liggaam is deur Christus gekoop om slegs vir Hom te dien.

Soos Paulus opmerk: Moenie betrokke raak in hartstogtelike begeerlikhede soos die heidene, wat God nie ken nie.

 

Die Bybel sê: Die Here sal mense vir al sulke sondes straf – 1 Thessalonisense 4:6.

God het ons nie geroep om onrein te wees nie, maar om 'n aan Hom toegewyde lewe te lei.

En wie hierdie opdrag verwerp, verwerp nie 'n mens nie, maar God, wat aan jou sy Heilige Gees gee. Weereens, hierdie vers herinner ons aan die feit dat ons die Heilige Gees ontvang het.

Jou liggaam is 'n tempel van die Heilige Gees.

Moenie 'n leefstyl lei wat sal veroorsaak dat die Heilige Gees jou lewe verlaat nie.

Moenie die rykdom wat jy ontvang het, weggooi nie.

Seksuele onsedelikheid sal jou dood veroorsaak, ja selfs die ewige dood.

Leef 'n toegewyde en eerbare lewe.

God het dit vir jou moontlik gemaak.

Hy het jou in omstandighede geplaas en jou lewenskwaliteit verbeter bo wat ooit vir mense moontlik sal wees.

Hy maak die deur oop vir ewige geluk, ewige rykdom, ewige lewe.

Maak gebruik van hierdie geskenke!

Moenie die Gees uitblus nie, want Hy wil jou meer en meer eerbaar en toegewyd maak.

 

Amen.

 

Vrae na aanleiding van die preek:

Skriflesing: Exodus 22:16-17; Deuteronomium 22:22-30; 1 Thessalonisense 4:1-8; Kolossense 3:1-10

Teks: Nav 7de gebod (Heidelbergse Kategismus Sondag 41)

Om hierdie preek te verwerk en verder daaruit te leer, volg hier ‘n paar vrae. Die antwoord kan in die preek gevind word, en sommige vrae vereis ook persoonlike oordenking.

1. Waaraan is dit sigbaar of iets ‘n afgod vir mense geword het?
2. Noem twee konsekwensies waartoe seksuele omgang buite die huwelik volgens Exodus 22:16-17 kon lei.
3. Wat beteken die woord “hoerery” in 1 Thessalonisense 4:3?
4. Wat is dikwels die beste om te doen as mense, plekke of webwerwe jou aanleiding gee om die 7de gebod te oortree?
5. Hoe kan ons die sewende gebod, danksy Christus, begin nakom?
6. Dank die Here vir al die huwelike in ons gemeente, en bid Hom dat hulle gesond mag bly.